Pasan Untuak Rang Mudo

Hidup manusia tak dapat ditakar , sebab itu kuasa Ilahi.

Dalam hidup banyak hal akan dihadapi,maka pasan rang tuo-tuo kito berikut ini patut kita jadikan sebuah pegangan dalam menjalani hidup.

Rang mudo, Nan Capek Kaki Ringan Tangan, Capek Kaki Indak Panaruang, Ringan Tangan IndakPamacah, Alun Disuruah Nyo Lah Pai, Alun Diimbau Nyo Lah Tibo, Tibo Tampak Muko Nan Janiah, Pai Taraso Hati Nan Suci

“manusia tahan kieh, binatang tahan lacuik, kilek baliung alah ka kaki, kilek kaco alah kamuko, tagisia labiah bak kanai, tasinggung labiah bak jadi”

Basilek diujung lidah
Malangkah dipangka karih
Bamain diujuang padang
Tahu dikieh kato putuih
Tahu digelek kato abih
Tahu diereang jo gendeang
Sarato kurenah jo baenah
Tahu dirunciang ka mancucuak
Tahu dirantiang kamalantiang
Tahu didahan kamahimpok
Tahu digantiang nan kaputuih
Tahu dicondong kamahimpik
Tahu dibiang nan katabuak
Tahu diunah kamahambek
Tahu dibayang kato sampai

Bulek kato dek mufakaik

Bulek aia dek pambuluah

Alua jo patuik tagak ditangah

Bana nan satu panyudahan

Sapuluah kelek ditampuah

Sabaleh lauik jo buiah

Namun bana hanyo sabuah

Pesong babuih puputan kaliang

Sabuah ujuid jo mukasuik

Dilengong ka suok jo ka kida

Dipakai baso jo basi

Dalam raso jo pareso

Jalan mandata ingek tataruang

Jalan manurun ta antak-antak

Jalan mandaki sasak angok

jalan malereang kok tagalincia

Ingek-ingek jago-jago

Kana diri kanalah badan

Tanduak bacapang kaki nan haluih

Karuik maruik samak sameto

Ingek juo sabalun kanai

Kulimek sabalun habih

Dalam hiduik di dunia ko

Banyak sansaro nan katumbuah

Ingek tasumbek jo tasanduang

Arih jo bijak ka dipakai

Ulemu dalam paham bakunci

Bapakai ukua jo jangko

Salamat badan kasubarang

Ukia nan turun dari Tampuang tangkai

Pariangan Lapan Koto nan Ampek Koto

Diateh nan Ampek Koto Dibawah

Pasangan di dakek pintu katurun

Palapeh dagang kabajalan

Panco ringek di tapi jalan

Mati-mati mako babuah

Ingek-ingek anak bajalan

Lauik sati rantau batuah

Semoga saketek dari ambo ko ado baiaknyo, salah jo khilaf tolong maafkan. Ampun jo rila ambo pintokan.

. . . batuajuang@gmail.com . . .